BLOOM-ING NOIR

 

Сите што редовно го следат мојот блог, знаат дека од самите негови почетоци сме подржувале домашни дизајнери и брендови. И кога станува збор за давање на подароци на најблиските, ги преферирам оние од мали локални домашни работилници, кои не само што се во лимитирано издание, туку во својата ДНК носат љубов и внимание, кои пак се пренесуваат на оној кому сте го подариле. Барем јас така размислувам. 

Секојпат кога сум купила производ од домашен бренд или дизајнер (често истите ги познавам или сум ги запознала лично), чувствувам дека сум направила нешто добро за себе и за околината. Како да сум освоила некоја мала, но значајна награда и сум допринела на овој или на оној начин. Верувам дека сите кои го следат мојот пример, знаат дека овие парчиња не се само набавка на производи за одредена потреба, туку чин на свест и совест, и нема поубаво чувство од тоа да знаете дека сте учествувале во нечиј сон и креативна визија. 

Нивниот пат до вашето срце е со винамтелно изработени дизајни и квалитетни производи, со многу срце и со душа. 

Од македонските дизајнери најмногу се воодушевавам на Росица Мршиќ, чијшто сензибилитет за убаво и креативно ми е многу близок. Нејзините парчиња се секогаш автентични, безвременски и изработени од високо квалитетни материјали кои на мојот изглед додаваат уметничка вредност. И верувајте секој пат кога носам нејзино парче, како тоа да е дел од мене, како втора кожа и најдобра верзија од себеси. И на секоја нејзина покана за соработка, се радувам како мало дете. 

Така беше и за нејзината последна лимитирана капсулна колекција Bloom, чиишто парчиња се изработени со нула отпад во произдниот процес и со посебна љубов и внимание со рачно изработени детали и автоски принтови, кои се синоним за нејзиниот РМ бренд. Станува збор за четири различни дизајни на блузи, во црна и бела боја, изработени од памук, со прилагодлив крој кој одговара на сечие женско тело. 

Истата има хуманитарен карактер, 10% од продажбата на секое парче од колекцијата е наменет за помош на децата од Детско СОС село. 

Јас ја одбрав Bloom Noir, иако морам да признаам дека сите четири дизајни ме освоија на прва. Овојпат решив да ја споделам во празнично комбо со црвено волуменозно здолниште и црвени Мери Џејнс. Секако за да биде поновогодишно, комбото го заокружив со црвени хулахопки и црвен кармин.

 

Ако радоста може да се купи, или има свој еквивалент во парични средства, тогаш вакви подароци од домашни дизајнери и брендови се начин да оваа радост се дели и зголемува. 

 

Блуза: Rosica Mrsik (tuka)

Сукња: Twinset

Чевли: Grafiti (tuka)

Шминка: Fabu Spot

Фотографија: Елена Трајкова

Look at vibe to look you best

Love,

E